Boeketoer deur Suid-Afrika (9 Maart tot 7 Mei)

Tydens die herfs en vroeë wintermaande van 2020 het ek ‘n uitgebreide Boeketoer deur Suid-Afrika onderneem wat my 3400 kilometer op die langpad tussen Kaapstad en Bloemfontein gestuur het. Die gedagte agter die Boeketoer was om die twee boeke wat ek in isolasie tydens korona geskryf het persoonlik aan soveel moontlik lesers in Suid-Afrika te gaan bekendstel. Stilspraak en Landluisteraar vorm as kunsboek en digbundel ‘n estetiese tweeluik. Die digbundel het uit die kunsboek ontstaan.

Ek kon die wonderlike gasvryheid van sowel individue as gevestigde instansies geniet. My eerste boekaanbieding was by die GrootBrak-Leeskring buite Mosselbaai en is geïnisieer deur my Afrikaanse mededigter René Bohen. Onder die energieke voorsitterskap van Annette Richter en haar bestuur het die saal op die Woensdagoggend van 9 Maart volgestroom. Die publiek se lewendige belangstelling was ‘n riem onder die hart. Dit was ‘n baie gesellige byeenkoms en ‘n groot aantal boeke is verkoop. ‘n Bietjie meer as 350 kilometer verderop het my niggie Anita Pienaar Schellinck my op 15 Maart ingewag om my aan haar vriendinne, mediese kollegas en kollegas in die geestesgesondheid voor te stel. Die fokus van my besoek aan Port Elizabeth was die animasiefilm ADEM van my en Diek Grobler oor die Covid19 virus. Dit was die Afrikaanse première van ADEM in Suid-Afrika. Uit sowel Stilspraak as Landluisteraar kon ek troos in kuns en gedigte aanbied vir dramatiese tye van verlies as gevolg van hierdie pandemie. Die potgooi wat opgeneem is deur Mariette Snyman het indirek hierby aangesluit met die titel Wabi-Sabi en hoe om ‘n pandemie emosioneel te oorleef.  Die term wabi-sabi is op p.201 in Stilspraak bespreek en het sodoende hierdie potgooi op my Boeketoer geregverdig. In Port Elizabeth het die tweeluik as geheelpakket opvallend goed verkoop.   

My volgende besoekpunt was 1000 kilometer landinwaarts na Bloemfontein waar NALN (die Nasionale Afrikaanse Literêre Museum en Navorsingsinstituut) my op 11 en 12 April vir twee optredes ontvang het. NALN se aktiwiteit is ook ondersteun deur die Bloemfonteinse Skrywerskring en die Argitektuurstudente van die UV. My optrede met Landluisteraar op die aand van 11 April het gepaardgegaan met ‘n tropiese storm wat na dae sy hoogtepunt bereik het en wat alreeds verwoesting in en om Bloemfontein gesaai het. Op die aand van my optrede het dit ook ‘n elektrisiteitsonderbreking veroorsaak. Die skielike donkerte het aanleiding gegee tot ‘n besondere sfeer, omdat die handjievol gaste gedwing was om baie gekonsentreer te luister. Die volgende oggend het die son deurgebreek en kon die saal volstroom vir die lesing uit Stilspraak. Hierna kon die boekverkope gelukkig beter op gang kom as in die duisternis van die vorige aand. Ek kon dolgelukkig uit Bloemfontein vertrek.

Die oorblywende twee optredes was albei in die Wes-Kaap. In die Bôrdienghuis van Wellington se Breytenbach Sentrum het Johan Nel op 20 April ‘n onderhoud met my gevoer oor Landluisteraar. Weer eens was die saal gepak. Daarvoor het Gerard van Aardt goed gesorg. Hy is die voorsitter van Wellington se Boekklub. Ook my uitgewer van Naledi (Johan Coetzee) en die persoon wat verantwoordelik was vir die grafiese ontwerp en uitleg van Landluisteraar (Karen Cronje) was onder die publiek. Dit was ‘n groot voorreg om hulle in die publiek te kon hê. Vorige kontakte wat ek in die lang skryfproses van Stilspraak gemaak het, het ook moeite gedoen om hierdie aand by te woon. Dankie daarvoor!

My laaste optrede was by SASNEV (die Suid-Afrikaanse Sentrum vir Nederland en Vlaandere) in Pinelands, Kaapstad. Dit is ook die ruimte waarin die Orde van den Prince, Afdeling Kaap de Goede Hoop mekaar gereeld ontmoet. As Nederlandse lid van die Orde van den Prince, Afdeling Tilburg het ek die besondere voorreg gehad om wedersyds groete en goeie wense aan die twee afdelings oor te dra. Ek is terughoudend dog hartlik en met openlike nuuskierig ontvang. Voorsitter Erwin Rode van Afdeling Kaap de Goede Hoop het vir my alle vryheid gegee om Stilspraak en Landluisteraar “in het Zuid-Afrikaans zonnetje te zetten.” Daardeur het ek dadelik tuis gevoel. Die uitgewer van African Sun Media (Nirode Bramdaw), die kunstenaar Strijdom van der Merwe en sy gesin en die filmregisseur van Sculpting this Earth – ‘n film wat binnekort oor Van der Merwe se oeuvre sal verskyn (Victor van Aswegen) – was onder andere deel van die publiek. Ek kon nie vir beter vra nie! ‘n Paar boeke van sowel Stilspraak as Landluisteraar het in aandagtige lesershande beland. Eureka Barnard, direkteur van SASNEV, het ook ‘n filmopname van my optrede vir YouTube gemaak met as verwysing Studio SASNEV Opname #6 2022.  Anders as by alle ander optredes is die oggend op 7 Mei met ‘n vraag- en antwoordsessie afgesluit. Vir my was dit tipies Nederlands. Ek kon tevrede én met nuwe energie vir my vertroude Nederlandse omgewing op die vliegtuig stap.